PROXECTO DE COOPERACIÓN INTERRITMOS RAÍCES VIVAS: RESIDENCIA CREATIVA EN ESPAZO NATURE (RAZO)

Vimianzo 2 de febreiro de 2026

"Interritmos Raíces Vivas" é un proxecto de cooperación promovido polos Grupos de Desenvolvemento Rural: Asociación Deloa (entidade coordinadora), Ribeira Sacra-Courel, Costa da Morte, Miño-Ulla, Salnés Ulla Umia, Asdecomor, Comarca de Lugo, Adercou, Terra e Auga, Sil Bibei Navea e Pontevedra Norte, no marco da intervención Leader de Galicia – PAC 2023_2027. Colabora a Fundación Paideia Galiza e a Fundación Paco de Lucía.

Nesta ocasión o proxecto achégase á Costa da Morte e continúa a súa aposta pola capacitación e a detección de talento en músicos novos, coa apertura do prazo de inscricións para participar nesta 3ª Residencia Creativa Musical, que se celebrará do 2 ao 5 de marzo en Espazo Nature (Razo, A Coruña). A iniciativa, de participación gratuíta, está dirixida a artistas galegos e galegas interesados en explorar a súa identidade visual e sonora nun ambiente de creación colaborativa.

Durante catro días e tres noites, as persoas seleccionadas traballarán arredor da súa imaxe persoal, estética sonora e comunicación profesional, contando co acompañamento de profesionais do ámbito do estilismo, a fotografía, a dirección de arte e o branding cultural. A proposta concibe a imaxe como unha extensión natural da música e do discurso artístico de cada participante.

A residencia desenvolverase nun entorno natural que invita á inspiración e á conexión creativa, ofrecendo ademais aloxamento e manutención de balde. Hai dispoñibles 8 prazas, e o prazo de inscrición permanecerá aberto ata o domingo 15 de febreiro ás 23:59 h.

Máis información e descarga do programa completo a través da seguinte ligazón: Interritmos | Raíces Vivas.

---

DESCARGAS_

>Dossier Residencia Creativa

---