O GDR acolle un encontro informativo sobre o proxecto Bid4Tenders para facilitar o acceso das Pemes á contratación pública
- hace 4 días
- 2 Min. de lectura
Vimianzo, 6 de marzo de 2026
A Confederación de Empresarios de Galicia en colaboración co GDR Costa da Morte organiza un encontro informativo co obxectivo de presentar unha ferramenta destinada a facilitar e potenciar a participación das pequenas e medianas empresas na contratación pública.
O acto celebrarase no Centro Sociocultural de Baio o próximo mércores 18 de marzo ás 18:00 horas.
Durante a sesión darase a coñecer o proxecto Bid4Tenders, desenvolvido no marco do Programa Interreg España Portugal (POCTEP) 2021 2027 pola Confederación de Empresarios de Galicia xunto coa AEP, CEVAL, IAPMEI e IGAPE.
Trátase dun servizo gratuíto dirixido a profesionais e empresas usuarias que ofrece acompañamento especializado durante todo o proceso de licitación pública. Entre os servizos que se ofrecen destacan:
Preparación de ofertas: asesoramento técnico para a elaboración de propostas sólidas e competitivas.
Asistencia e seguimento: orientación ás empresas en cada fase do procedemento de contratación.
Fomento de redes colaborativas: impulso de alianzas con socios estratéxicos de España e Portugal para concorrer conxuntamente a licitacións de maior envergadura.
Capacitación: organización de talleres e xornadas formativas para dotar ás Pemes de coñecementos clave neste ámbito.
Identificación de oportunidades: acceso a información actualizada sobre licitacións públicas no espazo transfronteirizo.
O propósito deste encontro é dar a coñecer os servizos do proxecto, establecer unha primeira toma de contacto coas organizacións do territorio e explorar posibles vías de colaboración para difundir esta oportunidade entre o tecido empresarial.
Dende a organización animan ás entidades e empresas interesadas a participar nesta sesión informativa e agradecen a confirmación de asistencia a través dos seguintes medios:
• correo electrónico: gdrcostadamorte@gdrcostadamorte.com
• Telf.: 981 717 358
> Departamento de comunicación do GDR Costa da Morte
Para máis información:
- 981 71 73 58 (Centraliña) - www.gdrcostadamorte.com -Twitter: @GDRCostadamorte - gdrcostadamorte.wordpress.com - Tamén podes visitar a nosa páxina en Facebook
Comentarios