O 11 DE FEBREIRO ARRANCA A NOVA EDICIÓN DA UNIVERSIDADE SENIOR NA COSTA DA MORTE
Vimianzo 10 de febreiro de 2025
O martes 11 de febreiro, ás 17:00 horas, terá lugar no Centro Sociocultural de Baio a inauguración da nova edición do Programa de Democratización do Coñecemento, impulsado pola Universidade Sénior da Universidade da Coruña e dirixido a persoas maiores de 50 anos da Costa da Morte. Nesta edición, están matriculadas máis de 60 persoas.
A Universidade Sénior da UDC, co apoio da Xunta de Galicia e en colaboración co GDR “Costa da Morte” e o Concello de Zas, pon en marcha este Programa de Formación Universitaria, que se desenvolverá entre febreiro e marzo no Centro Sociocultural de Baio (Zas).
Un total de 66 alumnos e alumnas, procedentes de oito concellos da Costa da Morte, participarán neste ciclo formativo, que será inaugurado o 11 de febreiro coa presenza da Directora da Universidade Sénior e do Alcalde do Concello de Zas.
O programa estrutúrase en tres módulos, con sesións teóricas e prácticas impartidas por profesorado da Universidade da Coruña, dous días á semana. As sesións abordarán diversas temáticas de interese:
MÓDULO I: HUMANIDADES E CIENCIAS SOCIAIS
• 11 de febreiro – A Dirección Artística no Cine | Profa. Victoria de León Sanjuán
• 12 de febreiro – A conduta económica: limitacións do modelo do Homo Economicus | Prof. José López Rodríguez
• 18 de febreiro – Literaturas do Mundo: unha viaxe á orixe dos libros | Profa. Elena Martín Cancela
MÓDULO II: CIENCIAS DA TERRA E TECNOLOXÍA
• 25 de febreiro – (Bio)invasións en Galicia: mecanismo, impacto e xestión | Prof. Sergio Rodríguez Roiloa
• 26 de febreiro – ADN Antigo e Evolución Humana: unha viaxe ao pasado a través dos nosos xenes | Profa. Gloria Mª González Fortes
• 5 de marzo – Descubrindo a Intelixencia Artificial: retos, aplicacións e ferramentas | Prof. Álvaro Michelena Grandío
MÓDULO III: CIENCIAS DA VIDA E DA SAÚDE
• 11 de marzo – Enfermidades Cardiovasculares e Diabetes | Prof. Luis Saleta Canosa
• 12 de marzo – O Cambio Climático: causas e consecuencias | Prof. Salvador Fojón Polanco
• 18 de marzo – Boas Prácticas para o Coidado do Benestar Psicolóxico | Prof. Carlos Freire Rodríguez
Clausura e xornada cultural na Coruña
O programa formativo finalizará cunha xornada de visitas académicas e culturais na Coruña, onde terá lugar o acto de clausura e entrega de diplomas, o 19 de marzo de 2025.
Con este programa, a Universidade Sénior achégase un ano máis ás persoas maiores de 50 anos das comarcas da Costa da Morte, coa intención de seguir dando resposta ás súas inquedanzas e necesidades formativas, como vén facendo desde a súa primeira edición no ano 2018.
DESCARGAS_
MÁIS INFORMACIÓN_
> Axentes de Desenvolvemento Local da Costa da Morte
> T. 981708303- Ext 25
> isabel.agra@concellodezas.org)
Comments